Tá sé ráite ag gníomhaireacht dídeanaithe Palaistíneacha na Náisiún Aontaithe UNRWA gur maraíodh seisear ball foirne dá chuid tar éis dhá ionradh aeir ag fórsaí Iosrael a bhuail scoil i gceartlár Gaza.
Deir UNWRA gurb é seo an líon is mó ball foirne atá maraithe in aon eachtra amháin ó thosaigh Iosrael ar ruathair ar Gaza tar éis ionsaí Hamas ar Iosrael an 7 Deireadh Fómhair seo caite.
Deir UNWRA freisin go raibh bainisteoir fosctha UNWRA i measc na ndaoine a maraíodh agus baill eile foirne a bhí ag cabhrú le daoine aslonnaithe.
Deir arm Iosrael i ráiteas go ndearna siad ionradh ar, mar a dúirt siad, ionad ceannais agus rialaithe i Nuseirat i lár Gaza, ionad a dúirt siad ar le Hamas é.
Deir UNWRA go bhfuil an scoil buailte cúig huaire ó thosaigh an cogadh, agus go bhfuil thart ar 12,000 duine aslonnaithe ann, mná agus leanaí a bhformhór.
Deir oifig na meán ag rialtas Gaza, atá faoi stiúr Hamas, gur maraíodh ar a laghad 18 nduine sa ruathar seo ag Iosrael.
Cháin an Taoiseach agus an Tánaiste an t-ionsaí is deireanaí seo ar Gaza, agus rinne comhbhrón le foireann na Náisiún Aontaithe.
Cháin Simon Harris an t-ionsaí a rinne Iosrael ar fhoirne eile de chuid na NA a bhí ag dáileadh vaicsíní póilió le leanaí Gaxa a chosaint ón ngalar. Dúirt sé nár cheart normálú a dhéanamh ar an gcontúirt saoil a thugann oibrithe deonacha orthu féin le fóirithint ar dhaoine eile.
Sos comhraic láithreach i nGaza agus saoileadh na ngiall go léir, a deir sé atá riachtanach agus fáíl gan chonstaic ná bac ar chúnamh daonnúil ar fud Gaza.
Cháin an Tánaiste agus an tAire Gnóthaí Eachtracha Micheál Martin an ruathar aeir, á rá go nglacann oibrithe daonnúla “rioscaí eisceachtúla chun soláthairtí ríthábhachtacha bia agus cúnaimh a sholáthar do dhaoine”.
“Tá dualgas ann iad a chosaint,” a dúirt sé.
Dúirt Ard-Rúnaí na Náisiún Aontaithe Antonio Guterres le Reuters nach raibh glacadh ar bith leis an easpa freagraachta as foireanna de chuid na NA agus oibrithe fóirithinte dhaonnúil a mharú.
Deir arm Iosrael go bhfuil bearta á ndéanamh acu chun an baol díobhála do shibhialtaigh a laghdú agus gur míleataigh iad ar a laghad an tríú cuid de na Pailistínigh atá maraithe sa chogadh i nGaza.
Úsáideann Hamas sibhialtaigh mar sciath daonne, a deir an IDF.
Deir aireacht sláinte Gaza go bhfuil 41,000 duine maraithe ó thosaigh cogadh Iosrael ar Gaza, mar fhreagra ar éis ionsaí Hamas ar Iosrael an 7 DF nuair a maraíodh 1,200 duine agus nuair a tógadh 250 duine ina ngialla.