Tá cruinniú iomlánach den Chomhairle Aireachta Thuaidh/Theas ar siúl i gCaisleán Bhaile Átha Cliath inniu agus an Taoiseach Simon Harris ina chathaoirleach air.
Tá Céad-Aire an Tuaiscirt Michelle O’Neill agus an LeasChéad-Aire Emma Little-Pengelly ar cheann na toscaireachta ó Fheidhmeannas Stormont.
Faoi chaibidil sa chruinniú tá ceisteanna a bhaineann le leas na hÉireann ar fad – ó Reachlainn go Cléire – go háirithe cúrsaí sláinte, iompair, talmhaíochta agus turasóireachta.
Seo an dara cruinniú iomlánach den Chomhairle Aireachta ó hathbhunaíodh na forais pholaitíochta ó thuaidh i dtús na bliana, agus an 28ú cruinniú ó bunaíodh é faoi fhorálacha Chomhaontú Aoine an Chéasta i 1998.
In Ard Mhacha i mí an Mheithimh a bhí an cruinniú deireanach.
Roimh an gcruinniú inniu, tharraing an Taoiseach aird ar thorthaí an chomhoibrithe idir an dá rialtas.
Luaigh sé go sonrach dhá mhórthogra a bhfuiltear ag tabhairt fúthu faoi láthair – athchóiriú Chanáil Uladh idir Loch Éirne i gCo Fhear Manach agus Cluain Eois i gCo Mhuineacháin, agus an droichead nua atá le tógáil trasna abhainn an Rí idir Corr na Muclach i gCo Lú agus Caol Uisce i gCo an Dúin.
Nuacht agus Cúrsaí Reatha RTÉ